Einar Páll Svavarsson

Vefsíðugerð í Drupal sækir hratt fram og eru vefsíðurnar nú komnar yfir milljón að tölu

Í dag eru vefsíður sem eru settar upp í Drupal opna hugbúnaðinum orðnar yfir ein milljón. Um er  að ræða vefsíður af öllum stærðum og gerðum.  Allt frá einföldum persónulegum vefsíðum einstaklinga yfir í stærstu og umfangsmestu vefsíður heims á vegum þekktra stórfyrirtækja.    Allt frá einföldum textasíðum yfir í yfirgripsmiklar samskipta- og fjölmiðlasíður. Á hverjum einasta degi fjölgar vefsíðum í Drupal kerfinu hratt og samhliða þróast afköst og möguleikar kerfisins á ógnar hraða.   Framleiðslufyrirtæki, fjölmiðlar, tónlistarmenn, háskólar, mannúðarsamtök, stjórnmálasamtök, vefverslanir, sveitarfélög og ríkisstofnanir um allan heim hafa sett upp vefsíður í Drupal til þess að spara fjármuni og auka afköst vefsíðunnar á sama tíma.

Hér á landi er ný vefsíða Ríkisútvarpsins sem opnaði fyrir rúmlega viku nýjast dæmið um skemmtilega og vel heppnaða vefsíðu sem er sett upp í Drupal vefumsjónarkerfinu.  Fyrri hafði Háskóli Íslands sett upp sína vefsíðu í Drupal.  Þá má nefna Myndlistaskólann í Reykjavík, nýja heimasíðu sem Þjóðskjalasafnið er að klára sem og fjölmargar heimasíður félagasamtaka, fyrirtækja og einstaklinga sem Emstrur vefsíðugerð hefur sett upp.  Má þar nefna heimasíðu rithöfundanna Guðna Th. Jóhannessonar og Kristínar Helgu Gunnarsdóttur, myndlistarmannanna Þóru Sigurðardóttur og Þórunnar Báru, heimasíðu karlakórsins Fóstbræður, heimasíðu Brunatæknifélags Íslands og Fatahönnunarfélags Íslands, Centra fyrirtækjaráðgjöf, sjárvarlíftæknisetrið  Biopol á Skagaströnd, matsölustaðinn 1862 í Hofi á Akureyri, Sterk.is forvarnarmiðstöð gegn mansali og vændi, ferðaskrifstofuna Víkingaslóðir í Noregi og Knattspyrnufélag Fjallabyggðar svo að örfá dæmi séu tekin.

Af erlendum síðum er af nægu að taka. Skrifstofa forsetna Bandaríkjanna, Garmin framleiðandi GPS tækja, The Economist, Fox News, The Whashington Post, New York Observer, Prime Minister of Australia, Department of Education í Bandaríkjunum, New York State Senate, Meritrust Credit Union, Estee Lauder, LA Galaxy, Lucas Arts, Pearl Jam, Dolly Parton, Eric Clapton, Pink, Paramount Pictures, Jamie Foxx, Kelly Clarkson, MTV UK, San Diego Museum og Art, Expedia og þannig mætti lengi telja.

Af þessu má ljóst vera að allir sem taka þá ákvörðun að setja upp vefsíður í Drupal eru í góðum málum og leggja jafnframt grunninn að öflugum og afkastamiklum vefsíðum. 

 

Heimasíða Guðna Th. Jóhannessonar sagnfræðings og rithöfundar

Núna í vikunni opnaði Guðni Th. Jóhannesson sagnfræðingur og rithöfundur heimasíðu, gudnith.is.  Heimasíðan var sett upp og unnin af mínu fyrirtæki, Emstrum vefsíðugerð.  Samstarfið við Guðna var sérlega ánægjulegt og áhugavert fyrir mig.  Nýlega hafði ég lokið við að lesa bókina um Gunnar Thoroddsen þegar Guðni kom til mín með erindi sitt.  Sem áhugamaður um stjórnmál og sögu með svolitla þekkingu á hvoru tveggja eftir nám í stjórnmálafræði fyrir mörgum árum var það var það bæði skemmtilegt og örvandi að ræða við Guðna meðan á uppsetningu vefsíðunnar stóð. 
Guðni Th. Jóhannesson er að sumu leyti óvenjulegur fræðimaður.  Óvenjulegur að því leyti að hann er líka frumkvöðull.  Þessi tvö hlutverk fræðimaðurinn og frumkvöðullinn eru oft á tíðum á andstæðum pólum.  Guðni hefur hins vegar sýnt svo um munar að þessir tveir geta auðveldlega rúmast í sama einstaklingum.  Jafnvel þannig að útkoman verði áhrifamikil.
Bækur Guðna sem núna eru orðnar átta talsins eru sérlega áhugaverðar fyrir áhugafólk um samtímasögu.  Sérstaklega fyrir þá sem hafa áhuga á stjórnmálasögu og hagsögu.  T.d. er bókin um Gunnar Thoroddsen mjög áhugaverð fyrir þá sem vilja skilja stjórnmálasögu tuttugustu aldar.  M.a. vegna þess að samhliða sögu Gunnars er Guðni að fjalla um atburði og þróun margra mála sem settu svip sinn á öldina alla.  Gunnar byrjaði nefnilega snemma í stjórnmálum og ferill hans spannar nánast alla öldina. T.d. fannst mér auðvelt að lesa út úr bókinni  hvernig siðmenning pólitískrar spillingar varð til á Íslandi og hvernig sérkenni þeirrar spillingar eru saman sett.  Eitthvað sem Guðni var líklega ekkert sérstaklega að reyna að miðla þegar hann skrifaði bókina.  En þannig er galdurinn bakvið þróttmikla sagnfræði, hún miðlar fortíðinni hlutlægt og gefur lesandanum tæki til að meta sjálfur löngu liðna atburði á nýjum forsendum og í nýju samhengi .
Á heimasíðunni er hægt að skoða feril og skrif Guðna og eru þau sett fram af þeirri nákvæmni sem vænta má af vandvirkum sagnfræðingi.   Þar er einnig hægt að skrá sig inn á síðuna og taka þátt í bloggi sem líklega verður bundið við skrif og framlag Guðna til samtímans.  Á heimasíðunni mun Guðni birta fréttir af ýmsu sem viðkemur samtímanum og hans skrifum, enda heimasíðan sett þannig upp í Drupal vefumsjónarkerfinu að Guðni á mjög auðvelt með að sjá alveg um hana sjálfur.   Innskráðir geta síðan komið með athugsemdir á fréttirnar.  Ef fólki líkar fréttin getur það deilt henni með vinum sínum á facebook og twitter eða sent vinum sínum tölvupóst um fréttina frá síðunni.  Þá er auðvelt að leita að upplýsingum á síðunni sem er sérlega gagnlegt þegar efni er orðið mikið. Heimasíðan er þannig gagnvirk og verður vonandi gott tæki fyrir Guðna til að fá viðbrögð frá lesendum. 
Það verður því áhugavert að fylgjast með skrifum Guðna á síðuna og sjá hvernig honum tekst að gera hana að því tæki sem heimasíða á að vera.  Tæki til samskipta og miðlunar.

Tónleikar í Salnum með Magnúsi Kjartanssyni

Fór á skemmtilega tónleika með Magga Kjartans (Magnús Jón Kjartansson) og Jóni Ólafssyni í Salnum í gærkvöldi. Þar spilaði Maggi mörg af þeim fallegu lögum sem hann hefur samið gegnum árin. Mörg lög sem við þekkjum vel frá honum sjálfum eða öðrum flytjendum. Og auðvitað í samræmi við auglýsta dagskrá spjölluðu þeir félagar saman um margt skemmtilegt. Ýmsar skemmtilegar uppákomur rötuðu inn á tónleikana, m.a. söng dóttir Magga með honum eitt lag, Gunnar Þórðarson og Stefán Hilmarsson spiluðu saman eitt lag eftir Magga og svo fékk Maggi afhenta viðurkenningu frá félagi tónskálda og textahöfunda. Skemmtileg kvöldstund með skemmtilegum tónlistarmanni. Eins og á tónleikum Magnúsar og Jóhanns voru áheyrendur flestir komnir af léttasta skeiði og hafði Jón Ólafsson á orði að gárungarnir kölluðu þessar kvöldstundir hans "Airwaves for oldies"